ПЕШВОИ МИЛЛАТ ВАРЗИШГОҲИ МАРКАЗИИ БАЛҶУВОНРО БА ИСТИФОДА ДОДАНД

23 сентябр Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, Президенти Кумитаи миллии олимпии Тоҷикистон, муҳтарам Эмомалӣ Раҳмон Варзишгоҳи марказии ноҳияи Балҷувонро бо 6 ҳазор ҷойи нишаст ба истифода доданд.

Варзишгоҳи марказии ноҳияи Балҷувон аз ҷумлаи иншооти ҷашнӣ ба ифтихори 30-солагии Истиқлоли давлатии Ҷумҳурии Тоҷикистон буда, масоҳати он 3,68 гектар, аз ҷумла майдони умумии зери иншоот 1446 метри мураббаъро ташкил медиҳад.

Корҳои сохтмонӣ дар иншоот соли 2019 оғоз гардида, бо ҷалби 45 нафар мутахассиси Ҷамъияти дорои масъулияти маҳдуди «Тоҷикроҳсоз» бо сифати баланд ба анҷом расонида шудааст.

Маблағгузории иншоот аз ҷониби Дирексияи сохтмони иншооти ҳукуматии Дастгоҳи иҷроияи Президенти Ҷумҳурии Тоҷикистон амалӣ гардида, он аз чор минбари нишастгоҳ ва ҳамчунин ҷойи махсус барои меҳмонони олиқадр иборат мебошад.

Ҳуҷраҳои кории маъмурият, нозир, доварон, ҷойи либосивазкунӣ, ҳуҷраи мураббиён, нуқтаи тиббӣ ва назорати допинги варзишгоҳ бо беҳтарин шароит дар қисматҳои зери нишастгоҳҳо сохта шудаанд.

Майдони бозии футболи варзишгоҳ 105х68 метрро ташкил дода, масоҳати 13 ҳазору 944 метри мураббаъ сабзазор гардидааст.

Ҳамчунин як қисмати иншоот дар масоҳати беш аз 2400 метри мураббаъ сафолакпӯш ва атрофи он ба андозаи 7 ҳазор метри мураббаъ сабзазор шудааст.

Варзишгоҳи марказии ноҳияи Балҷувон дар заминаи таваҷҷуҳи ҳамешагии Пешвои миллат, муҳтарам Эмомалӣ Раҳмон ба рушди соҳаи варзиш ва солимии ҷомеа бунёд гардидааст.

Мавриди истифода қарор гирифтани варзишгоҳ дар самти ташкили тамринҳои ҳаррӯза, баргузории мусобиқаҳои гуногуни ноҳиявию вилоятӣ, чорабиниҳои фарҳангии сатҳи баланд, тарғибу ташвиқи тарзи ҳаёти солим ва оммавигардонии варзиш миёни сокинон имкони васеъ фароҳам овард.

Баробари ба истифода додани иншооти хуштарҳи варзишӣ дар ноҳияи Балҷувон 10 нафар бо ҷойи кори доимӣ ва маоши хуб таъмин гардиданд.

Дар ҳудуди варзишгоҳ 4 равшанидиҳандаи калон ва 25 адад чароғи махсус (торшер) насб карда шудаанд, ки баробари фароҳам сохтани шароит барои шабона машғул шудан ба варзиш ба зебоии мавзеъ зиннати хосса зам менамояд.

• ←
• →