Душанбе – мизбони Чемпионати CAFA-2019 миёни ҷавонон

Дар идомаи Чемпионати Ассотсиатсияи футболи Осиёи Марказӣ (CAFA) миёни наврасон 9-15 август дар шаҳри Душанбе Чемпионати CAFA-2019 миёни ҷавонони то 19-сола доир мегардад.

Ин навбат аз миёни панҷ даста беҳтарин дастаи минтақа муайян мешавад. Дар Чемпионати CAFA-2019 панҷ даста – мунтахабҳои ҷавонони Тоҷикистон, Эрон, Узбекистон, Туркманистон ва Афғонистон ширкат мекунанд.
Ҳамоҳангсози генералии мусобиқот котиби генералии Ассотсиатсияи футболи Осиёи Марказӣ Санҷар Ризоев аз Узбекистон мебошад, ёрдамчии ҳамоҳангсози генералӣ Илдар Гарифуллин аз Қирғизистон таъин шудааст. Комиссарони бозиҳо Умед Ҷамолӣ аз Эрон ва Михаил Токачев аз Қирғизистон хоҳанд буд. Нозирони доварон Муҳсин Торки аз Эрон ва Аллаберген Сапаев аз Туркманистон интихоб шудаанд. Бозиҳоро ҳайати доварон аз шаш кишвари аъзои Ассотсиатсияи футболи Осиёи Марказӣ – Тоҷикистон, Эрон, Узбекистон, Афғонистон, Қирғизистон ва Туркманистон – ҳакамӣ менамоянд. Кишвари моро дар ин самт довари FIFA Сайёдҷон Зайниддинов аз Душанбе ва ёрдамчии довари FIFA Ҳамза Шоимардонов аз Хуросон намояндагӣ мекунанд.
Ҳамагӣ дар доираи Чемпионати CAFA-2019 миёни ҷавонон 10 бозӣ баргузор мешавад. Ҳамаи бозиҳо дар Варзишгоҳи марказии ҷумҳуриявии шаҳри Душанбе сурат мегиранд. Мусобиқа тариқи системаи даврӣ дар як давр доир гашта, дастае, ки холҳои бештар ба даст меорад, ғолиб мегардад.
Чемпионати CAFA-2019 барои тими ҷавонони то 19-солаи Тоҷикистон як марҳилаи омодагӣ ба мусобиқоти интихобии Чемпионати Осиё-2020 маҳсуб меёбад, ки 2-6 октябр дар Душанбе баргузор мешавад. Дар ин мусобиқа тими ҷавонони кишвар бо роҳбарии сармураббӣ Зайниддин Раҳимов дар гурӯҳи “С” бо дастаҳои ҷавонони Сурия, Лубнон ва Малдив бозӣ мекунад.

Чемпионати CAFA-2019 миёни ҷавонон (U-19)

1-ум давр
9 август (ҷумъа)
17:00. Афғонистон – Туркманистон
20:00. Узбекистон – Эрон

2-юм давр
10 август (шанбе)
17:00. Афғонистон – Узбекистон
20:00. Туркманистан – ТОҶИКИСТОН

3-юм давр
12 август (душанбе)
17:00. Эрон – Туркманистон
20:00. ТОҶИКИСТОН – Афғонистон

4-ум давр
13 август (сешанбе)
17:00. Эрон – Афғонистон
20:00. Узбекистон – ТОҶИКИСТОН

5-ум давр
15 август (панҷшанбе)
17:00. Туркманистон – Узбекистон
20:00. ТОҶИКИСТОН – Эрон

• ←
• →