Қуръакашии VI Ҷоми Президенти Тоҷикистон оид ба дзюдо баргузор шуд

Имрӯз – 1 октябр дар Кумитаи миллии олимпии Ҷумҳурии Тоҷикистон қуръакашии 6-ум мусобиқаи байналмилалӣ оид ба дзюдо барои дарёфти Ҷоми Президенти Тоҷикистон баргузор шуд.

Мусобиқа бо иқдоми Федератсияи дзюдои Тоҷикистон дар ҳамкорӣ бо Мақомоти иҷроияи маҳаллии ҳокимияти давлатӣ дар шаҳри Душанбе, Кумитаи миллии олимпии Тоҷикистон, Кумитаи кор бо ҷавонон ва варзиши назди Ҳукумати ҷумҳурӣ 2-5 октябр дар Қасри тенниси шаҳри Душанбе аз рӯи 7 категорияи вазнӣ миёни мардон доир мегардад.
Дар мусобиқа 248 варзишгар аз ҷумҳуриҳои Қазоқистон, Қирғизистон, Тоҷикистон ва Узбекистон иштирок мекунанд.
Мусобиқаи солҳои гузашта дар вазни мутлақ баргузор мешуд, имсол бошад, варзишгарон дар вазнҳои маъмулии гуштини дзюдо миёни мардон: -60 кг, -66 кг, -73 кг, -81 кг, -90 кг, -100 кг, +100 кг қувва меозмоянд.
Ғолибону ҷоизадорон дар баробари медалу диплом соҳиби ҷоизаи пулӣ мегарданд. Федератсияи дзюдои Тоҷикистон ба ғолибон 10000 сомонӣ, барои ҷои дуюм 5000 сомонӣ ва барои ҷои сеюм 3000 сомонӣ тақдим хоҳад кард.

• ←
• →